Kea ‑seie' 'ʋn
54
Dafi 'a tɔ' "kpei naa ‑tɩ ‑ɛ ‑nɩa 'de bleʋn klaa" 'a 'dʋ sbɛ 'di ɛ, ɔ 'je Blaadɩ ‑blea "dbu bla ‑wɛe ɔ je ble.2 Ɔ 'crɩa ɛɛ' 'dʋ tu 'mɛ nɔ" ‑ɛ 'di Sifeɛn' nyʋ‑ jia Sailɩ 'tmʋa' ʋʋ 'na: Dafi pa 'kwla 'de ‑a "klu.
3 Kea, ‑ma ‑cɛ" 'kpa 'wlʋʋ de ‑ɩn ‑je 'ʋn 'pʋʋ'
'de ‑ma 'nynɩ 'a ‑tɩ 'ʋn,
‑ɩn ‑wlʋ 'ʋn o 'de ‑ma "ikmaa' 'ʋn.
4 'Oo Kea, ‑ɩn ‑te' 'ma baewlu doun" o,
‑ɩn sie wlu ‑a ‑wlʋa 'de 'ʋn 'wɔn tɔ' o.
5 Dɛ ‑nʋɛ 'dʋɩ ‑wi" a ‑fɔn' 'ʋn o,
'diwɔnyniʋn ‑a ‑pɔan' 'ma 'kmʋ ‑saa' i,
ʋʋa' doun" se ‑mɔ Kea i nɩ‑. ‑Te' ‑kwlʋ.
6 'Kaa Kea mɛ ‑ɛɛ ‑wlʋ 'ʋn o,
Tʋ "bo 'a sʋn mɛ 'ɩn 'pɛn jai.
7 Dɛsaʋn 'ma tʋnyʋ nɩɛ "i ʋʋ 'jea 'ʋn "jrii nʋʋɛ,
ɛɛ muɛ ʋʋpʋ‑ "kpei ‑craa.
'De ɛɛ' wlu "kpei kpʋn 'a ‑tɩ' 'ʋn ɛ,
ɛ ‑sa ʋʋpʋ‑ i.
8 'De 'ma pɛe ‑wee'‑ 'ʋn 'ma muɛ tɔ' ‑tea' 'ɩn 'je 'sraadɩ to‑.
Ma muɛ ‑ma 'nynɩ "i 'bɛɛa' 'oo Tʋ "bo,
dɛ ‑nʋɛ ‑ɩn ‑nmɔ 'diwɔn.
9 Dɛ ‑nʋɛ ɛmɛ ‑nɩ ‑mɔ ‑sa 'ʋn 'de 'kle ‑wee'‑ "klein "kpei.
Kaan ka la, 'ɩn ke 'ma tʋnyʋ 'je "juua "i ‑tee'‑.